გიორგი მამარდაშვილის ტრანსფერი – ჯერ ბორნმუთი, მერე ლივერპული. საქართველოს ნაკრების მეკარე იჯარით მინიმუმ 1 სეზონს ბორნმუთში გაატარებს. ლივერპულში კი ოფიციალურად ალისონის წასვლის შემდეგ გადავა.
მხარეებმა შეთანხმებას მიაღწიეს – გიორგი მამარდაშვილი ლივერპულის ფეხბურთელი გახდება. თუმცა ეს ოფიციალურად, უდიდესი ალბათობით, 2025 წლის, ან არაუგვიანეს, 2026 წლის, ზაფხულში მოხდება.
მამარდა მერსიდალეულიც მას შემდეგ გახდება, რაც ალისონ ბეკერი კლუბს დატოვებს. დღეის მდგომარეობით, ეს 1 წლის შემდეგ უნდა მოხდეს.
ამგვარი კომბინაციის მიზეზი პრემიერ ლიგის წესია იჯარის შესახებ. მისი მიხედვით, კლუბს იმავე სატრანსფერო ფანჯრისას ნაყიდი ფეხბურთელის პრემიერ ლიგის კლუბშივე განათხოვრება ეკრძალება. ამ კომბინაციით კი კლუბები წესებს არ დაარღვევენ.
ამ შემთხვევაში ქართული ფეხბურთის ისტორიაში ეს სარეკორდო ტრანსფერი იქნება. მისი ღირებულება, ბონუსების ჩათვლით 40 მილიონი ევრო იქნება.
ლივერპული ამ კომბინაციის შესაბამის პროექტს ამზადებს, რომელსაც ვალენსიას მფლობელს, სინგაპურელ პიტერ ლიმს წარუდგნენ. საბოლოო მოლაპარაკება უახლოეს დღეებში უნდა შედგეს და ტრანსფერიც დაიხუროს.
ლივერპული მამარდაშვილს პირად კონტრაქტზე შეუთანხმდა
ამას გარდა კლუბსა და ფეხბურთელს შორის შეთანხმება პირად კონტრაქტზეც შედგა. ესპანური მედიის ინფრომაციით, მამარდას წლიური ანაზღაურება ინგლისში 4 მილიონი ევრო, 3 434 560 ფუნტ სტერლინგი იქნება.
მოლაპარაკების პროცესსა და ბოლო კვირებში, საქართველოს ნაკრების მეკარემ, უარი რამდენიმე არაბული კლუბის, სოლიდურ შემოთავაზებაზეც თქვა.
განხილვის დონეზე, რამდენიმე ევროპული TOP ჩემპიონატის წევრი გუნდების ინტერესებიც იყო. ამას გარდა, ლივერპულის სატრანსფერო სქემაში ჩართვაზე პრემიერ ლიგის 4 კლუბი იყო დაინტერესებული, თუმცა ყველაზე ოპტიმალური ბორნმუთის ვარიანტია.
მამარდაშვილის ტრანსფერი – რატომ არის ბორნმუთი იდეალური
სპეციფიკა, ენა, აქცენტი (ლივერპულურს მაინც ვერაფერს გაუგებს), კულტურა, გარემო, ამინდი, საკვები და, რაღა თქმა უნდა, ატმოსფერო – გიორგი მამარდაშვილს პრემიერ ლიგაში ადაპტაცია დასჭირდება, გაერთიანებულ სამეფოში კი – აკლიმატიზაცია.
ამისთვის კი გარდამავალი კლუბი და ეტაპი იდეალურია. გიორგის კლასს კბილის მოსინჯვა აღარ სჭირდება და ეს ქართველმა მეკარემ ბოლო 3 წელში ყველას დაუმტკიცა.
თუმცა ფეხბურთში ნიუანსების მნიშვნელობაზე ბევრს აღარ გესაუბრებით. შეგახსენებთ, რომ არაერთ შემთხვევაში ასეთ დეტალებს ბევრი ფეხბურთელის კარიერაში გარდამტეხი მნიშვნელობა უთამაშია.
შესაბამისად, ალისონის წასვლის შემდეგ მამარდა ლივერპულურ კარიერას და ფეხბურთის საკლუბო მწვერვალის ერთ-ერთ წევრს უკვე მზად შეხვდება.
ბორნმუთის მთავარი მწვრთნელი ანდონი ირაოლაა. ესპანელი სპეციალისტი, რომელსაც მამარდაშვილის დამატება, სრულფასოვან ტრანსფერადვე სურდა.
მამარდამ ინგლისურიც იცის, თუმცა უპირატესი საკომუნიაკაციო ენა ესპანურია. ეს კი ბორნუთის ანდონი ირაოლას ფაქტორის გამო არათუ წინაღობა, უპირატესობა იქნება.
ასევე, ლივერპულის ამჟამინდელი სპორტული დირექტორი რიჩარდ ჰიუზი, ბორნმუთის ტექნიკური დირექტორი იყო. არსებული კონტაქტები კი მამარდაშვილის საუკეთესო ინტერესის დაცვის წინაპირობა უნდა გახდეს.
საინტერესოა სპორტული თვალსაზრისიც. მამარდა მთლად უკონკურენტო გარემოში არ მიდის. კაპიტანი ნეტოს გარდა, ალუბლებს მეკარის პოზიციაზე ირლანდიელი მარკ ტრავერსი და ინგლისელი უილ დენისიც ჰყავთ.
ცხადია, მამარდაშვილი ნომერ პირველ მეკარედ იქნება მოაზრებული, თუმცა გარემოს უკონკურენტო ნამდვილად არ ეთქმის. თან, 35 წლის ნეტოს ატლეტიკო პარანაენსეს შემდეგ ფიორენტინას, იუვენტუსის, ვალენსიასა და ბარსელონას გამოცდილება აქვს. ეს კი მამარდაშვილის ზრდისთვის კარგი წინაპირობა იქნება.
ასევე, მნიშვნელოვანია, რომ მამარდაშვილის იჯარა ისე გაფორმდეს, რომ ამ სეზონში გიორგის ვალენსიაში ნათამაშები არ ჰქონდეს. ამ შემთხვევაში საქართველოს ნაკრების მეკარეს, საჭიროების შემთხვევაში, ბორნმუთის დატოვება და ლივერპულში მომენტალური გადაბარგება უმალ შეეძლება და აღარ დაირღვევა წესი, რომლის მიხედვითაც ფეხბურთელი 1 სეზონში სამ სხვადასხვა კლუბში ვერ ითამაშებს.
ნოტინგემი vs ბორნმუთი & ბორნმუთი vs ნიუკასლი
ბორნმუთი პრემიერ ლიგის 2024-25 სეზონის პირველ ტურში ნოტინგემს ეთამაშება. მატჩი 17 აგვისტოს 18:00 საათზე დაიწყება, თუმცა ამ დროისთვის გიორგი სათამაშოდ ცხადია, მზად არ იქნება.
აი მე-2 ტურში ბორნმუთი უკვე შინ, ნიუკასლის წინააღმდეგ ითამაშებს. იმ ნიუკასლის, რომელსაც მამარდას დამატება თავადაც სურდა.
ცხადია, ორივე ბორნმუთის მატჩებს პირდაპირ ეთერში setantasports.com-სა და Setanta Sports-ზე ნახავთ.
