NBA – იანის ანტეტოკუნმპოს 64 ქულა!

მორიგი შეხვედრები გაიმართა NBA-ის რეგულარულ სეზონში. ვნახეთ რამდენიმე საინტერესო შეხვედრა და ერთი განსაკუთრებული პერფორმანსი.

მოდი ამით დავიწყოთ, მილუოკ ბაქსმა შური იძია, თასიდან გამოვარდნის შემდეგ ინდიანას კიდევ ერთხელ შეხვდა და 140:126 დაამარცხა.

ბაქსი vs ინდიანა

იანისი გააბრაზეს, თასიდან გამოვარდნამ როგორც ჩანს ძალიან ცუდ ხასიათზე დააყენა, თან ჰალიბარტონმა აჯობა და კარგად უწყის რომ მასზე უკეთესია, საერთოდ, ასეთ მოთამაშეებს მიაჩნიათ რომ ყველაზე მაღლა დგანან და ასეც უნდა იყოს, უნდა ჰქონდეთ ეს ამბიცია.

ანტეტოკუნმპოს არასდროს უჭირს თვითმოტივირება, ახალი მოტივაციის გამოძებნა, ხელთავიდან ავსება იმ ენერგიით, რომელიც წამლეკავი იქნება მთელი ლიგისთვის. ჰოდა, წალეკა.

იფრინა, მილეწ-მოლეწა ინდიანას დაცვა და ახალი რეკორდებიც დაამყარა. იანისმა 64 ქულა ჩააგდო!!

ეს მისი კარიერის საუკეთესო მაჩვენებელია. აქამდე პირადი რეკორდი 55 ქულა იყო ვაშინგტონთან, ინდიანასთან კი ყველაზე ბევრი 54 ქულა აქვს აღებული. ახლა კი ყოველგვარ ზღვარს გასცდა – 64 ქულა!

მოხსნა მილუოკის შიდა რეკორდი – აქამდე მაიკლ რიდს ჰქონდა ყველაზე მეტი ქულა, 2006 წელს იუტასთან 57 ქულა მოუტანა გუნდს. დიდხანს შენარჩუნდა ეს რეკორდი და ვის თუ არა, იანისს უნდა მოეხსნა.

თამაშში 28 მცდელობიდან 20 სროლა ზუსტი იყო. 32 საჯარიმოდან 24 ზუსტად გამოიყენა. ასე გახდა იანისი NBA-ის ისტორიაში მეხუთე მოთამაშე, რომელმაც 60+ ქულა დააგროვა ისე რომ მისი FG 70% ზე მაღალი იყო.

დიდებული გრძნობაა ამ ყველაფრის მიღწევა, კალათბურთს ვთამაშობ მოსაგებად, ვთამაშობ იმისათვის, რომ თანაგუნდელებს დავეხმარო, მაგრამ თამაშის ბოლოს, რეკორდის მოხსნა ამ არენაზე, ამ გულშემატკივრის თვალწინ დიდებული შეგრძნებაა”, – თქვა იანისმა მატჩის შემდეგ.

37 წუთში 64 ქულა, 14 მოხსნა, 3 ასისტი, 4 ჩაჭრა და 1 ბლოკი – ასეთია იანისის მონაგარი.

რეგულარული სეზონი

  • ვაშინგტონი vs პელიკანსი – 122:142

ზაიონ უილიამსონს არ უთამაშია, ბრენდონ ინგრამმა 40 ქულა ჩააგდო.

  • დეტროიტი vs ფილადელფია – 111:129

ჯოელ ემბიდის ანგარიშზე 41 ქულა, 11 მოხსნა და 5 ასისტია.

  • მაიამი vs შარლოტი – 115:104
  • ტორონტო vs ატლანტა – 135:128

პასკალ სიაკამის ანგარიშზე 33 ქულა, 7 მოხსნა და 7 ასისტია. ტრეი იანგმა 35 ქულა და 17 მოხსნა დააგროვა.

  • ჰიუსტონი vs მემფისი – 117:104

ჯეირენ ჯექსონმა 44 ქულა ჩააგდო, დერიკ როუზმა 19 ქულას მოუყარა თავი.

  • სან ანტონიო vs ლეიკერსი – 119:122

ვიქტორ ვემბანიამამ 30 ქულა და 13 მოხსნა დააგროვა. ენტონი დევისმა 37 ქულა და 10 მოხსნა. ჯეიმსს არ უთამაშია.

  • ფინიქსი vs ბრუკლინი – 112:116

დურანტს 27 ქულა ჰქონდა, დევინ ბუკერს 34 ქულა და 12 ასისტი.

  • იუტა vs ნიუ იორკ ნიქსი – 117:113

ჯულიუს რენდელმა 32 ქულა და 12 მოხსნა დააგროვა.

ავტორის შესახებ
არმაზ ახვლედიანი
არმაზ ახვლედიანი
მე ვარ Setanta Sports-ის ჟურნალისტი არმაზ ახვლედიანი. ამჟამად ვწერ ანალიტიკურ სტატიებს ფეხბურთზე, სოციო-ეკონომიკური და პოლიტიკური გავლენების შესახებ. გარდა ამისა, ვწერ ბლოგებსა და მიმოხილვებს. აქამდე პოლიტიკის, ლიტერატურისა და მოგზაურობის შესახებ ვწერდი ჟურნალ ლიბერალში, რადიო თავისუფლებაზე და National Geographic-ზე. ვარ ლიტერატურული ჟურნალის, "დარაჯის" ერთ-ერთი დამფუძნებელი და მთავარი რედაქტორი. ვარ ფსიქოლოგიისა და ტურიზმის ბაკალავრი და შედარებითი ლიტერატურათმცოდნეობის მაგისტრი. ხშირად ვიყენებ ლიტერატურულ თეორიებს ბლოგების სტრუქტურის ასაგებად, ასევე, გამომიყენებია შედარებითი ანალიზი, ფეხბურთელებსა და ლიტერატურულ პერსონაჟებს შორის.

მიიღე წვდომა ჩვენს პლატფორმაზე