ხვიჩა კვარაცხელიას ტრანსფერი – პსჟ-ში 7-იანი თავისუფალია. რა ნომრით ითამაშებს კვარა პარი სენ ჟერმენში ჯერ უცნობია, თუმცა მისთვის სასურველი ნომერი 7 კლუბში თავისუფალია.
კვარაცხელიას ტრანსფერი პსჟ-ში უახლოეს საათებში გაოფიციალურდება. შემდეგ საქართველოს ნაკრების შემტევი ნაპოლიში თანაგუნდელებსა და სტაფს გამოემშვიდობება და პარიზში გაემართება.
ხვიჩა კვარაცხელია – ტრანსფერი
L’equipe-ის ინფორმაციით ხვიჩა კვარაცხელიას სამედიცინო შემოწმება პსჟ-ში 15 იანვარსვე, საღამოს გაიმართება.
ტრანსფერის გაოფიციალურებას პარიზული კლუბი, სწორედ ოთხშაბათს გეგმავს.
ხვიჩა კვარაცხელია პსჟ-თან 4.5-წლიან კონტრაქტს მოაწერს ხელს, რაც ფრანგულ გუნდთან ქართველის მომავალს 2027 წლის ივნისამდე დააკავშირებს.
კვარას ანაზღაურება წელიწადში 8 მილიონი ევრო იქნება.
ხვიჩა კვარაცხელია – პსჟ-ის ნომერი 7
ეს დეტალები გასაგებია, თუმცა საფეხბურთო ნაწილსაც შევეხოთ. პსჟ-ში ნომერი 7 თავისუფალია. მის მიმართ კვარას სიმპათია საყოველთაოც ცნობილია.
ხვიჩა კვარაცხელია საქართველოს ნაკრებში 7 ნომრით თამაშობს. ნაპოლიში კი რადგან ნომერი 7 თავიდან დაკავებული იყო 77 ნომერი შეარჩია – და გახდა კიდეც ნუმერო სეტანტა სეტე.
პსჟ-ში 7-იანი გუნდიდან კილიან მბაპეს მადრიდის რეალში წასვლის შემდეგ თავისუფალია.
საფრანგეთის თასზე შეზღუდული ნუმერაციის წესების გამო ის რამდენჯერმე ვიტინიას ეცვა, თუმცა ვიტინიას ძირითადი ნომერი კლუბში 17-ია.
შესაბამისად, იმის ალბათობა, რომ პსჟ-ის ახალი შვიდიანი, რეალში გადაბარგებული, კილიან მბაპეს შემდეგ, სწორედ ხვიჩა კვარაცხელია იყოს, უდიდესია.
პსჟ-ის 7-იანები
პარი სენ ჟერმენს ისტორიაში უდავოდ, რამდენიმე გამორჩეული 7-იანი ჰყოლია. მბაპე, ჟიული, ლეონარდო, კომბუარე და სხვები.
კილიან მბაპე
მათგან ცხადია, მეხსიერებას ყველაზე მკაფიოდ კილიან მბაპე ახსოვს. მსოფლიოს 2018 წლის ჩემპიონმა ვარსკვლავებით გაძეძგილ პარიზულ გუნდშიც კი უნიკალური ადგილი დატოვა.
გასაგებია, იმ პსჟ-ისგან ყველა უფრო მეტს ელოდა და ლეგიტიმურადაც, თუმცა თავად კილიანის სტატისტიკა საუცხოო იყო. 308 მატჩში კუ ნინძამ 256 გოლი და 106 საგოლე გადაცემა მიითვალა.
ლუდოვიკ ჟიული
ლუდოვიკ ჟიული პსჟ-ში 2008-2011 წლებში თამაშობდა. მომუსხველი საფეხბურთო უნარების გარემარბს კარიერის პიკი მონაკოსა და ბარსელონაში უკვე უკან ჰქონდა მოტოვებული, თუმცა საკუთარი კვალი პსჟ-შიც დატოვა.
100 შეხვედრაში რონის რეგიონში დაბადებულმა ფეხბურთელმა 16 გოლი გაიტანა.
საინტერესოა, რომ არც რომელიმე სხვა კლუბსა და ნაკრებში ჟიულის 7-ნომრიანი მაისური არასდროს სცმია.
ლეონარდო
ლეონარდოსაც ჟიულის მსგავსად, 7-იანი მხოლოდ პსჟ-ში ეცვა. ბრაზილიელი ფეხბურთელი პარიზული გუნდის ფორმას 1996-1997 წლებში ირგებდა.
46 ჩატარებულ შეხვედრაში მის ანგარიშზე 10 გოლი და 9 საგოლე გადაცემა იყო.
სხვათა შორის, წლების შემდეგ, 2011 წელს ლეონარდო ამავე კლუბის საფეხბურთო მიმართულების ხელმძღვანელი გახდა. კარლო ანჩელოტისა და სერია A-დან ფეხბურთელების ტრანსფერები მისი პირველი ნაბიჯი იყო.
სხვა ფეხბურთელებიდან, სხვადასხვა დროს, პსჟ-ში 7 ნომრიანი მაისური ისმაელ ღარბის, ანდერ ერერას, მოიზე კინს, პაბლო სარაბიას, მუსა დიაბის, ერიკ მაქსიმ შუპო მოტინგს, ადრიენ რაბიოს, ლუკას მოურას, ჟერემი მენეზს, პეგი ლუინდულას, ფაბრის პანკრატს, ალიუნ ტურეს, კაბა დიავარას, ანდრე ლუისს, ალოიზიო ჩალუპას, კრისტიანს, ელდერ ბაპტისტას, დანიელ ბრავოს, ანტუან კომბუარეს, ლორენ ფურნიეს, ამარა სიმბას, ჟან-ფრანსუა შარბონიეს, კრისტიან პერესს, ჟერარ ჟანვიონს, მანუელ აბრეუსა და იანიკ ჟილაშონს მოურგიათ.
ხვიჩა კვარაცხელია – ტრანსფერი
იქნება თუ არა კვარა პსჟ-ის მომდევნო 7-იანი მოკლე დროში, ოფიციალურად გახდება ცნობილი. მანამდე კი გეტყვით, რომ პსჟ-ის მომდევნო თამაშების განრიგი ასე გამოიყურება.
| თარიღი | ტურნირი | მეტოქე | სტადიონი |
|---|---|---|---|
| ოთხშაბათი, 15 იანვარი | საფრანგეთის თასი – 10 რაუნდი | ესპალი-სენტ-მარსელი | სტადიონი მარსელ-მიშელინი |
| შაბათი, 18 იანვარი | ლიგა 1 – მე-18 ტური | ლანსი | სტადიონი ბოლერ-დელელისი |
| ოთხშაბათი, 22 იანვარი | ჩემპიონთა ლიგა – მე-7 ტური | მანჩესტერ სიტი | პარკ დე პრენსი |
| შაბათი, 26 იანვარი | ლიგა 1 – მე-19 ტური | რეიმსი | პარკ დე პრენსი |
| ოთხშაბათი, 29 იანვარი | ჩემპიონთა ლიგა – მე-8 ტური | შტუტგარტი | ემჰაშპეა არენა |
ჩემპიონთა ლიგაზე, ლიგის ფაზის დასრულებამდე პსჟ კვარას ვერ დაარეგისტრირებს. შესაბამისად, ქართველს ახალი გუნდის დახმარება მხოლოდ პლეი ოფიდან შეეძლება.
პსჟ-ში ხვიჩა კვარაცხელიას დებიუტი სავარაუდოდ, 26 იანვარს ლიგა 1-ში რეიმსის წინააღმდეგ უნდა შედგეს.
მატჩების ხილვას კი პირდაპირ ეთერში setantasports.com-ზე შეძლებთ.
setantasports.com-ზე ფასდაკლების მისაღებად შეგიძლიათ პრომო კოდები გამოიყენოთ.
NEWS24 – ერთთვიან გამოწერაზე – 30%
YEAR24 – ერთწლიან გამოწერაზე – 30%
