MMA-ში გრან-პრის იშვიათად თუ ვნახავთ. ძირითადად, გრან-პრი მაშინ იმართება, როდესაც MMA-ის ორგანიზაციას კონკრეტული მიმართულება, ან და საწყისი ეტაპი გააჩნია.
ევროპის მასშტაბით MMA-ის ისტორიაში პირველი გრან-პრი სტარტს 4 მარტს, ჩეხეთის ქალაქ ოსტრავაში აიღებს და ორგანიზატორი ევროპის ერთ-ერთი საუკეთესო ორგანიზაცია OKTAGON MMA იქნება.
მილიონიან გრან-პრიში 16 აქტიური და 4 სარეზერვო მებრძოლი იღებს მონაწილეობას. 20-ვე მებრძოლი ევროპის კონტინენტზე საუკეთესოა და ცალსახაა, რომ აღნიშნული ტურნირი MMA-ს მაყურებლებში უდიდეს ინტერესს იწვევს.
OKTAGON MMA-მ გრან-პრის ჩატარება ქვესაშუალო წონაში გადაწყვიტა, სადაც ქართველი “სნაიპერი”, ამირან გოგოლაძე მიიღებს მონაწილეობას და ეცდება, რომ მილიონევროიანი გრან-პრის გამარჯვებული გახდეს.
ამირან გოგოლაძის მეტოქე პირველ ეტაპზე, დანიელი მებრძოლი, ლუის გლისმანი იქნება. გლისმანის ანგარიშზე კარიერაში 9 გამარჯვება და 2 მარცხია.
სტილისტურად, დანიელი მებრძოლი ბრაზილიური ჯიუ ჯიცუს სპეციალისტია. მას 9 გამარჯვებიდან 6 მტკივნეულით აქვს მოპოვებული.
ქართველმა მებრძოლმა ბოლოს 2022 წლის აგვისტოში, Dana White’s Contender Series-ზე იბრძოლა და ძალიან სამწუხაროდ, პირველ რაუნდში მხრის ტრავმა მიიღო, რის გამოც ბრძოლის გაგრძელება ვეღარ შეძლო. გოგოლაძეს კარიერაში 14 გამარჯვება და 3 მარცხი აქვს. 14 გამარჯვებიდან კი 10 – პირველი რაუნდის ფინიშით.
OKTAGON MMA Tipsport GameChanger-ის პირველი რვა დაპირისპირება ასე გამოიყურება:
- ამირან გოგოლაძე – ლუის გლისმანი
- ლეანდრო სილვა – ანდრეას მიხაილიდისი
- კრისტიან იუნგვირტი – ტატო პრიმერა
- ბოიან ველიჩკოვიჩი – იონ სურდუ
- კრისტიან ეკერლინი – მელვინ ვან სუიდამი
- დავიდ კოზმა – ლუკას შივიეცი
- სამუელ კრიშტოფიჩი – ალექს ლოჰორე
- მატე კერტეში – ჯონ ჰეტევეი
აღსანიშნავია, რომ ნებისმიერ ეტაპზე გამოვარდნილ მებრძოლს გრან-პრიში დაბრუნების შანსი ექნება, თუკი აქტიური მებრძოლი ტრავმას მიიღებს ან ვერ შეძლებს ორთაბრძოლის ჩატარებას.
OKTAGON MMA Tipsport GameChanger-ის მილიონიანი გრან-პრი სტარტს 4 მარტს აიღებს და 4 ნოემბერს დასრულდება.
