ისტორიულ თამაშამდე სულ რამდენიმე საათი რჩება. ლებრონ ჯეიმსი NBA-ის ყველა დროის საუკეთესო მექულე უნდა გახდეს!
ლეიკერსი თბილისის დროით დილის შვიდ საათზე ოკლაჰომას შეხვდება. საკალათბურთო მსოფლიო სწორედ ამ შეხვედრაში ელის რეკორდის მოხსნას. ლებრონს სულ რაღაც 36 ქულა აშორებს ქარიმის რეკორდის დამხობამდე.
ლებრონ ჯეიმსი – 38,352, ქარიმ აბდულ-ჯაბარი – 38,387
აბდულ-ჯაბარი ცხრილის სათავეში 1984 წლის 5 აპრილს მოექცა, როცა უილტ ჩემბერლენს გადაასწრო.
თუ ლებრონმა თანდერთან ვერ შეძლო საკმარისი ქულების ჩაგდება, (რაც ძნელად სავარაუდოა) მაშინ აბდულ-ჯაბარის ყოფილ გუნდთან, მილუოკისთან შეძლებს რეკორდის მოხსნას.
NBA-ის რეკორდსმენები ქულებით
საუკეთესო მექულეების ათეული ასე გამოიყურება:
| ქარიმ აბდულ-ჯაბარი – 38,387 | 1,560 თამაში | საშუალოდ 24.6 ქულა ერთ შეხვედრაში |
| ლებრონ ჯეიმსი – 38,352 ქულა | 1,409 თამაში | საშუალოდ 27.2 ქულა ერთ შეხვედრაში |
| კარლ მელოუნი – 36,928 ქულა | 1,476 თამაში | საშუალოდ 25.0 ქულა ერთ შეხვედრაში |
| კობი ბრაიანტი – 33,643 ქულა | 1,346 თამაში | საშუალოდ 25.0 ერთ შეხვედრაში |
| მაიკლ ჯორდანი – 32,292 ქულა | 1,072 თამაში | საშუალოდ 30.1 ქულა ერთ შეხვედრაში |
| დირკ ნოვიცკი – 31,560 ქულა | 1,522 თამაში | საშუალოდ 20.7 ქულა ერთ შეხვედრაში |
| უილტ ჩემბერლენი – 31,419 ქულა | 1,045 თამაში | საშუალოდ 30.1 ქულა ერთ შეხვედრაში |
| შაკილ ონილი – 28,596 ქულა | 1,207 თამაში | საშუალოდ 23.7 ქულა ერთ შეხვედრაში |
| კარმელო ენტონი – 28,289 ქულა | 1,260 თამაში | საშუალოდ 22.5 ქულა ერთ შეხვედრაში |
| მოუზეს მელოუნი – 27,409 ქულა | 1,329 თამაში | საშუალოდ 20.6 ქულა ერთ შეხვედრაში |
ათეულში ყველაზე მეტი თამაში აბდულ-ჯაბარს აქვს ჩატარებული. ხოლო, საშუალოდ ყველაზე მეტ ქულას მაიკლ ჯორდანი და უილტ ჩემბერლენი აგროვებდნენ, – 30.1
ვინ არის ქარიმ აბდულ-ჯაბარი
ყველა დროის ერთ-ერთი საუკეთესო ცენტრი. ბევრის აზრით საუკეთესოც. როგორც წესი, ამ პოზიციაზე უილტ ჩემბერლენთან უწევს ხოლმე პაექრობა, ყველა დროის საუკეთესო ცენტრის ტიტულისთვის.
მერე მოდიან შაკილ ონილი, ჰაკიმი და ა.შ. თუმცა, ვისთვის როგორ, ამაზე კამათი გაუთავებლად შეიძლება.
თავად აბდულ-ჯაბარს მიაჩნია, რომ ყველა დროის ერთ-ერთი დაუფასებელი მოთამაშეა, რადგან იშვიათად თუ მოხვდება ყველა დროის საუკეთესოთა სიაში. თავად მიიჩნევს, რომ ამაზე პრეტენზია უნდა ჰქონდეს.
თუმცა, ჯორდანის, ლებრონისა და მეჯიქის წინ ძალიან იშვიათად აყენებენ.
ქარიმი უმეტესად ცნობილია თავისი “ჰუკით”, სროლით, რომლის დაფარებაც უბრალოდ შეუძლებელია. მას მერეც გვინახავს ასეთი სროლები, მაგრამ ვერავინ ასე ელეგანტურად, ასეთი სიხშირითა და ასეთი სიზუსტით ვერ ასრულებდა ამ სროლას, როგორც ქარიმ აბდულ-ჯაბარი.
სად და როგორ ვუყუროთ ლოს ანჯელეს ლეიკერსი vs ოკლაჰომა სიტი თანდერს
26 იანვრის შემდეგ ლეიკერსი პირველ საშინაო შეხვედრას ჩაატარებს.
ლეიკერსი vs თანდერის მატჩს Setanta Sports-სა და setantasports.com-ზე პირდაპირ ეთერში ნახავს.
დიდი ალბათობით, ისტორიული მატჩი crypto.com Arena-ზე, თბილისის დროით 7:00 საათიდან დაიწყება.
TOP 4 მექულე ანგელოზების ქალაქიდან
საუკეთესო მექულეების პირველ ოთხეულში ყველას უთამაშია ლოს ანჯელეს ლეიკერსში. მართალია, განსხვავებული როლი შეასრულეს ორგანიზაციის ისტორიაში, განსხვავებული სახელიც დატოვეს, მაგრამ ისტორიამ თითოეული დაიმახსოვრა ყვითელ ფორმაში.
ახლა ერთი ლოს ანჯელესელი მეორის რეკორდს მოხსნის. ოკლაჰომასთან, ან, მილუოკისთან, ან მერე… არ აქვს მნიშვნელობა როდის. ლებრონი აუცილებლად ავა მწვერვალზე.
