28 აგვისტოს მონაკოში უეფას ჩემპიონთა ლიგის ფაზის წილისყრა გაიმართა, სადაც გავიგეთ ყველა ის მატჩი, რომელიც 2025/26 წლების სეზონის ლიგის ფაზაზე გაიმართება.
ქართველები ჩემპიონთა ლიგაზე
უპრეცედენტოა, რომ ჩემპიონთა ლიგის ძირითად ბადეში საქართველოს ნაკრების 5 ფეხბურთელი ითამაშებს, რომელთა მეტოქეებიც მონაკოში გამართულმა წილისყრამ გაარკვია.
მატჩების განრიგი ცნობილი შაბათს, 30 აგვისტოს გახდება, მანამდე კი შეგიძლიათ ჩემპიონთა ლიგის განახლებული ფორმატის წესებს მოცემულ ლინკზე გაეცნოთ.
ჩვენს პლატფორმაზე ფასდაკლების მისაღებად შეგიძლიათ, პრომო კოდები NEWS25 ან YEAR25 გამოიყენოთ.
NEWS25 – ერთთვიან გამოწერაზე – 30%.
YEAR25 – ერთწლიან გამოწერაზე – 30%.
პროცესი ამ ორი ბანერიდან სასურველზე ხელის დაჭერითაც შეგიძლიათ დაიწყოთ.
ამასთან, ძველი პრომო კოდები – NEWS24 და YEAR24 კვლავ აქტიურია.
ხვიჩა კვარაცხელიას პსჟ, გიორგი მამარდაშვილის ლივერპული და გიორგი ქოჩორაშვილის სპორტინგი ჩემპიონთა ლიგაზე ავტომატურად მოხვდნენ.
აქვეა ნიუკასლის 17 წლის ქართველი ფეხბურთელი – ვახო სალია, თუმცა რამდენად იქნება ქართველი ტალანტი ედი ჰაუს საჩემპიონთალიგო განაცხადში, საეჭვოა.
სელტიკთან მატჩამდე setantasports.com-ი ლუკა გადრანს დაუკავშირდა და საინტერესო ინტერვიუ ჩაწერა.
გადრანი-ზარიას დუეტმა ქაირათთან ერთად სენსაციური გზა გაიარა საკვალიფიკაციო ეტაპზე, სადაც ერთმანეთის მიყოლებით სლოვენიური ლუბლიანა, ფინური კუპსი, სლოვაკური სლოვანი და შოტლანდიური სელტიკი დაამარცხა.
საინტერესოა, რომ ამ სეზონის შემდეგ ქართველ ფეხბურთელთა რაოდენობა, ვისაც ჩემპიონთა ლიგის ძირითად ეტაპზე უთამაშიათ 31-მდე გაიზარდა.
მამარდაშვილი, ქოჩორაშვილი, გადრანი და ზარია ჩემპიონთა ლიგის ამ ეტაპზე პირველად ითამაშებენ.
განვიხილოთ ქართველი ფეხბურთელების გუნდების მეტოქეები ლიგის ფაზაზე და დავიწყოთ ჩემპიონთა ლიგის მოქმედი გამარჯვებულით, ხვიჩა კვარაცხელიათი.
კვარა კამპ ნოუზე ითამაშებს
ბევრის აზრით ჩემპიონთა ლიგური წილისყრა პირველი კალათიდან ყველაზე რთული სწორედ პარიზული გრანდისთვის გამოდგა.
პარიზში ლიგის ფაზის ეგიდით მოქმედი ჩემპიონები მიუნხენის ბაიერნს, ბერგამოს ატალანტას, ლონდონის ტოტენჰემს და ტაინსაიდურ ნიუკასლს უმასპინძლებენ.
ხვიჩასთვის ატალანტა ნაცნობი და კომფორტული მეტოქეა, ნაპოლიში თამაშის დროს ქართველმა ბერგამოულ გუნდთან 3 მატჩი ჩაატარა და 2 გოლი გაიტანა.
ბაიერნის, ტოტენჰემის და ნიუკასლის წინააღმდეგ ხვიჩა თავისი კვალის დატოვებას პირველად შეეცდება.
გასვლით შეხვედრებს პსჟ ბარსელონას, ლევერკუზენის, სპორტინგისა და ბილბაოს წინააღმდეგ ჩაატარებს.
ბუნებრივია დიდ ინტერესს იწვევს კვარას თამაში ბარსელონას წინააღმდეგ, იმ დიდებულ სტადიონებს, სადაც ხვიჩა კვარაცხელიას უთამაშია, კამპ ნოუც დაემატება.
ქართველმა მაყურებელმა აუცილებლად უნდა ჩაინიშნოს პარი სენ-ჟერმენისა და სპორტინგის დაპირისპირება, სადაც ეროვნული ნაკრების ორი ლიდერის, ხვიჩა კვარაცხელიას და გიორგი ქოჩორაშვილის დერბი შედგება.
აღსანიშნავია, რომ ლევერკუზენთან და ბილბაოსთან ჩასატარებელი გასვლითი მატჩებიც რთული იქნება პარიზული კლუბისთვისთვის. ამ კლუბების დამარცხებასაც, კვარა თავის კარიერაში პირველად შეეცდება.
მამარდაშვილი ჩემპიონთა ლიგაზე | წილისყრის შედეგები
ჩემპიონთა ლიგის კიდევ ერთი ფავორიტი, გიორგი მამარდაშვილის ლივერპულის მეტოქეები ენფილდზე რეალ მადრიდი, ატლეტიკო მადრიდი, პსვ და ყარაბახი იქნებიან.
გასვლით მატჩებს მერსისაიდელები შესაბამისად ინტერის, აინტრახტის, მარსელისა და გალათასარაის წინააღმდეგ ჩაატარებენ.
მიუხედავად იმისა, რომ ამ ეტაპზე მამარდას სათამაშო პრემიერ ლიგაში არ ეძლევა, არის მოლოდინი, რომ როგორც მინიმუმ, ქართველი მეკარე, ლივერპულის კარგი სვლის შემთხვევაში, ჩემპიონთა ლიგის დასკვნით ტურებში მაინც ვიხილოთ. ამასთან გვაქვს გასულ სეზონში კელეჰერის მადრიდის რეალთან თამაშის მაგალითიც.
ქართული დერბი ლისაბონში | setantasports.com-ზე
ლისაბონში ვიხილავთ კიდევ ერთ ქართულ დერბის, სადაც ქოჩორაშვილის სპორტინგი ლიგის ფაზაზე ლუკა გადრანისა და გიორგი ზარიას ქაირათს შეხვდება.
ყაზახური გუნდის გარდა, ქოჩორა ლისაბონში მარსელს, ბრიუგეს და პსჟ-ს შეხვდება.
გასვლით თამაშებს პორტუგალიის ჩემპიონები ბაიერნს, იუვენტუსს, ნაპოლის და ბილბაოს დაუპირისპირდებიან.
ქოჩორამ ნასიონალის წინააღმდეგ სასტარტო შემადგენლობაში ითამაშა, ასე რომ, არის მოლოდინი რომ სეზონის მიმდინარეობისას 26 წლის ქართველი დაიმკვიდრებს თავის ადგილს გუნდში და ჩემპიონთა ლიგაზეც მასაც ხშირად ვიხილავთ.
საოცნებო სეზონი ქაირათისთვის | წილისყრა
ჩემპიონთა ლიგაზე სენსაციურად მოხვედრილი ლუკა გადრანის და გიორგი ზარიას ქაირათი ყაზახეთში მადრიდის რეალს, ბრიუგეს, ოლიმპიაკოსს და პაფოსს დაუხვდება.
გასვლით თამაშებს კი ინტერის, არსენალის, სპორტინგისა და კოპენჰაგენის წინააღმდეგ ჩაატარებენ.
თითოეული ეს თამაში ყაზახური გუნდის ფეხბურთელებისთვის ოცნების ახდენას ჰგავს, სოციალურ ქსელში მათი რეაქციაც გავრცელდა, სადაც ისინი ლონდონის არსენალთან გასვლით მატჩს დიდი სიხარულით ხვდებიან.
გიორგი ზარია ჩემპიონთა ლიგის საკვალიფიკაციოზე 3-ჯერ ვიხილეთ – ოლიმპიას, კუპსის და სლოვანის წინააღმდეგ და ყველა ჯერზე ქართველი სათადარიგოდან ჩაერთო თამაშში.
რაც შეეხება ლუკა გადრანს, ის ჯერ ჩემპიონთა ლიგაზე არ გვიხილავს, თუმცა ოპტიმალურ ფორმაში ჩადგომის შემდეგ, 28 წლის მცველს ევროპის ყველაზე პრესტიჟულ ტურნირზე აუცილებლად ვიხილავთ.
