ბუდუ ზივზივაძე ჰაიდენჰაიმში ითამაშებს. ტრანსფერი უკვე გაოფიციალურდა. შესაბამისად, ბუდუ ზივზივაძე ბუნდესლიგაში 1-ელ შეხვედრას 11 იანვარს გამართავს.
ბუნდესლიგაში ქართველი ფეხბურთელი ბრუნდება. ეს კი მე-2 ბუნდესლიგის საუკეთესო ბომბარდირი იქნება.
გერმანიის რანგით უმაღლეს დივიზიონში ბუდუ ზივზივაძის დებიუტი უნიონ ბერლინის წინააღმდეგ შედგება.
ბუდუ ჰაიდენჰაიმის სამწვრთნელო ბაზა, ალგორფაზე კლუბს უკვე შეუერთდა და 11 იანვრის მატჩისთვის ხვალიდან მოემზადება.
ჰაიდენჰაიმთან ბუდუ ზივზივაძის კონტრაქტი 2029 წლამდეა გათვლილი.
ტრანსფერში მონაწილე კლუბები შეთანხმდნენ, რომ გარიგების პირობები კონფიდენციალურად დაეტოვებინათ. შესაბამისად, სატრანსფერო თანხა ცნობილი არ არის.
ბუდუ ზივზივაძე ჰაიდენჰაიმში – კომენტარი ტრანსფერზე
ბუდუმ ბუნდესლიგა 2-ის მიმდინარე სეზონი 12 გატანილი გოლით და 1-ლი ადგილით დატოვა. თავად კარლსრუე კი ამჟამად მე-2 ადგილზეა.
ბუდუს პირველი კომენტარი ტრანსფერის შემდეგ ჰაიდენჰაიმის ოფიციალურ ვებ გვერდთან გავრცელდა.
“ჰაიდენჰაიმის მესვეურებს სურდათ და ცდილობდნენ ჩემს დამატებას. სწორედ ამიტომ, მსურდა, პირდაპირ მესარგებლა ამ შესაძლებლობით და ბუნდესლიგაში მეთამაშა.
ახლა მსურს ჩემი წვლილი შევიტანო იმ მიზანში, რასაც სეზონის ბოლოს, ბუნდესლიგაში ჰაიდენჰაიმის დარჩენა ჰქვია.
მოუთმენლად ველი ბუნდესლიგის განახლებას.”
ბუდუ ზივზივაძე
საქართველოს ნაკრების ცენტრ ფორვარდის ტრანსფერს ჰაიდენჰაიმის ხელმძღვანელობაც გამოეხმაურა.
ბუდუ ზივზივაძე ჰაიდენჰაიმში – კლუბის CEO ჰოლგერ ზანვალდი შეთანხმებით აღფრთოვანებას ვერ მალავს.
“ბუდუს და კარლსრუეში მის განვითარებას ახლოდან ვაკვირდებოდით. ის უმაღლეს დონეს ჯერ კიდევ გასულ სეზონში აჩვენებდა. მიმდინარე სეზონში კი პირველი წრე კიდევ უფრო მაღალ დონეზე ჩაატარა – 17 მატჩში 12 გოლი.
ბუდუმ ნათლად წარმოაჩინა, თუ რა განსაკუთრებული უნარ-ჩვევები აქვს. დარწმუნებულნი ვართ, რომ მას უმალ შეუძლია ჰაიდენჰაიმს დაეხმაროს, რომ ბუნდესლიგიდან არ გავარდეს.
მოხარულნი ვართ, რომ მან ჩვენ აგვირჩია.”
ჰოლგერ ზანვალდი
ბუდუ ზივზივაძე გახდება მე-12 ქართველი ფეხბურთელი, ვინც ბუნდესლიგური კლუბის რიგებში იქნება. ხოლო – მე-11 ვინც ოფიციალურ შეხვედრას ბუნდესლიგის ეგიდით გამართავს.
2024 წელს ბუდუ ზივზივაძემ ყველა ტურნირზე, საკლუბო და სანაკრებო დონეზე 24 გოლი და 8 ასისტი გაიფორმა.
ბუნდესლიგა 2 – 19 გოლი 5 ასისტი – 33 მატჩი
DFB პოკალი – 2 გოლი 3 ასისტი – 3 მატჩი
საქართველოს ნაკრები – 3 გოლი – 13 მატჩი[409 წუთი]
ჰაიდენჰაიმი vs უნიონ ბერლინი
ბუდუ ზივზივაძე ჰაიდენჰაიმში – ისტორია 11 იანვარს დაიწყება. ფრანკ შმიდტის გუნდი შინ უნიონ ბერლინს მიიღებს და წაგებათა 6-მატჩიანი სერიის დასრულებას შეეცდება.
მატჩის პირდაპირი რეპორტაჟის ნახვა, 11 იანვარს setantasports.com-ზე 18:30 წუთიდან შეგეძლებათ.
