Душанба куни ғолибликка асосий даъвогарлардан бири Франция ҳамда яхши авлодга эга Украина терма жамоаси мусобақадаги иштирокини бошлайди.
ЕВРО-2024 4-kun – Украина Руминияни енга оладими?
Ўз тарихида 4-бор Европа чемпионатида қатнашадиган Украина 2016 йилдан бери биринчи марта мусобақа финал босқичига йўлланма олган Руминияга қарши баҳс олиб боради. Ҳар икки жамоа мураббийи – Эдвард Иорданеску ва Сергей Ребров учун илк катта мусобақага айланади. Украина сафида Олександр Зинченко, Артём Довбик, Андрей Лунин, Виктор Циганков ва Михайло Мудрик асосий юлдузлар сифатида кўрсатилмоқда. Руминия эса асосан жамоавий ўйин эвазига ўзини кўрсатиб, саралаш баҳсларида атиги 5 гол ўтказиб юборди.
Тахминий таркиблар
Руминия: Молдован, Бурка, Драгушин, Рус, Банчу, Мариуш Марин, Разван Марин, Станчу, Ман, Драгуш, Михайла.
Украина: Лунин, Коноплия, Забарни, Матвиенко, Зинченко, Шарапенко, Степаненко, Судаков, Циганков, Довбик, Мудрик.
Эдвард Иорданескунинг ўйиндан олдинги фикрлари
– Бу ажойиб давр. Ҳар бир мураббий тайёрланган, ишлаган ва орзу қилаётган. Бу орзуларнинг ушалишидир: шунча узоқ вақтдан кейин йўлланмани қўлга киритдик. Бу ерда имкон қадар кўпроқ қолишни истаймиз. Саккиз йилдан кейин энг кучлилар сафига қайтдик, биз буни хоҳлагандик. Машғулотлар яхши ўтди, таркибни сараладик, кўп таҳлил қилдик ва ўргандик, чин дилдан меҳнат қилдик. Биргаликда катта имкониятга эга буюк жамоани шакллантира оламиз, – деб таъкидлади Иорданеску.
Сергей Ребровнинг ўйиндан олдинги фикрлари
– Европа чемпионатида барча рақибларимиз кучли. Руминия эса саралаш гуруҳида биринчи ўринни эгаллади. Ўз ўйинимизга кўпроқ эътибор қаратишимиз керак деб ўйлайман. Уларнинг таркибида кўплаб яхши савияли ижрочилар бор. Улар топ клубларда ўйнашмаса ҳам хориж лигаларида фаолият олиб боришади. Руминияга ҳурмат билан муносабатда бўламиз.
ЕВРО-2024 4-kun – Бельгия Словакияга қарши ўйинда фаворит
Саралаш ўйинларида Бельгия 8 ўйинда 20 очко тўплашга эришди, Ромелу Лукаку 14 гол муаллифи бўлди. Словакия эса 10 баҳсдан 7тасида ғалаба қозониб, Португалиядан кейин 2-ўринни эгаллади. Жуда кучли футболчиларга эга дея қаралган Бельгия аввалги икки мусобақада чорак финалда иштирокини тўхтатишга мажбур бўлган. Энди эса жамоа бу натижани яхшилашга уриниб кўрмоқчи. Словакия эса меҳнаткаш ўйинчилар ҳисобига кутилмаган сюрприз тақдим этишга ҳаракат қилиши аниқ.
Тахминий таркиблар
Бельгия: Кастеелс, Фаc, Витсел, Де Кюйпер, Кастан, Мангала, Онана, Доку, Троссард, Лукаку, Де Брюйне.
Словакия: Дубравка, Пекарик, Вавро, Шкриняр, Ханцко, Куцка, Лоботка, Дуда, Шранц, Боженик, Хараслин.
Доменико Тедесконинг ўйиндан олдинги фикрлари
– Қуръадан кейиноқ барча гуруҳда бизнинг фаворит эканимиз ва гуруҳдан ўтишимиз ҳақида гапирди. Қоғозда шундай кўринади, аммо футбол майдонда ўйналади, яхшиямки қоғозда эмас. Словакия саралашда иккита ўйинда ютқазди холос. Ҳар икки сафар Португалияга. Шунинг ўзи барчасини кўрсатиб турибди, – деб айтиб ўтди Бельгия устози.
Франческо Кальцонанинг ўйиндан олдинги фикрлари
– Йигитлар борини беришади. Жамоани ЕВРОга олиб чиққанимдан хурсандман. Камчиликларимизни биламиз, йигитлар синовларга очиқ ва тайёр. Улар терма жамоада одатдагидан бошқа позицияларда ўйнашади, бу энг катта фарқни юзага келтирадиган қийинчилик. Футболчилар бирдам. Жамоа сафида катталар каби ўйнай оладиган ёшларнинг кўплиги менга умид бағишлайди, – дея фикр билдирди Кальцона.
ЕВРО-2024 4-kun – Австрия қаршисида даҳшатли Франция
Мусобақа ғолиблиги учун асосий даъвогар жамоалардан бири Франция ўзининг юлдузли таркиби билан биринчи беллашувини Австрияга қарши ўтказади. Французлар сўнгги 4 катта турнирнинг 3тасида финалга чиқишди. Саралаш босқичида Дидье Дешам шогирдлари фақат 2 очко йўқотишди. Австрия эса Бельгиядан атиги бир очко ортда қолган ҳолда гуруҳда 2-поғонани эгаллади. Гуруҳдан Польша ва Голландия терма жамоалари ҳам ўрин олган. Шу сабабли осон ўйинлар бўлмайди. Ҳар икки жамоа учун турнирни ғалаба билан бошлаш катта аҳамиятга эга.
Тахминий таркиблар
Австрия: Пенц, Пош, Линхарт, Траунер, Мвене, Лаймер, Зайвальд, Зиммер, Сабитцер, Баумгартнер, Грегорич.
Франция: Меньян, Кунде, Салиба, Упамекано, Эрнандес, Гризманн, Канте, Рабьо, Дембеле, Тюрам, Мбаппе.
Ральф Рангникнинг ўйиндан олдинги фикрлари
– Бир бирга кучлироқ бўлишимиз лозим: ҳужумга ўтишда ҳамда вазиятлардан фойдаланишда қатъийроқ ҳаракат қилишимиз шарт. Шу билан бирга рақибни кўплаб имконият яратишига йўл қўймаслик лозим. Айни пайтда Мбаппе ва Холанд дунёнинг энг кучли ҳужумчилари саналишади. Биз буни биламиз. Бироқ у ҳам қолган 11 футболчининг бири. Жамоа сифатида яхши ҳимояланиб, Килианга кўп имкон қолдирмаслигимиз даркор, – деб айтди Австрия мураббий.
Дидье Дешамнинг ўйиндан олдинги фикрлари
– Австрияни кўпчилик назарига илмаслиги мумкин, аммо улар охирги йилларда жуда катта ўсишга эришишди. Миллатлар Лигасида уларга қарши ўйинда қандай даражада эканини кўрганмиз. Жуда катта ўсган Европа жамоаси. Биз ўйинга тўғри руҳият билан ёндошиб, кучли тарафларимизни кўрсатишимиз лозим. Франция терма жамоаси бўлганимиз учунгина учрашувларни ўйнамасдан ютиб бўлмаслигини тушунишимиз шарт.
Ўйинларни қандай томоша қилиш мумкин?
setantasports.com обуначилари Ўзбекистонда 51 беллашувнинг барчасини жонли эфирда бепул томоша қилиш имкониятига эга бўлишади. Ўйинларни фақат Setanta Sports ОТТ платформаси ва иловасида томоша қилиш мумкин.
ЕВРО-2024 4-kun
Руминия – Украина, 18:00
Бельгия – Словакия, 21:00
Австрия – Франция, 00:00
