კვარა ნაპოლის და ნეაპოლელებს გამოემშვიდობა. ვიდეო მიმართვა საქართველოს ნაკრების შემტევმა ფეისბუქის საკუთარ გვერდზე გაავრცელა.
კვარა ნაპოლის გამოემშვიდობა
“მიჭირს და რთულია, თუმცა დამშვიდობების დრო მოვიდა,” – ემოციურ მიმართვას ხვიჩა კვარაცხელია ამ სიტყვებით იწყებს.
“აქ საოცარი პერიოდი გავატარე. ერთად უამრავი მოგონება დავაგროვეთ. ბევრი საოცარი ემოცია განვიცადეთ. ნეაპოლი ჩემთვის სახლი იყო, სადაც თითოეული თქვენთაგანის დამსახურებით თავს საუკეთესოდ ვგრძნობდი. ის გზა, რაც ერთად გავიარეთ, ახლა თავში მიტრიალებს და ძალიან ემოციურია”.
ხვიჩა კვარაცხელია
“ვიცი ჩემი წასვლით, გული ძალიან გწყდებათ, თუმცა ერთ დღეს ყველაფერს მოგიყვებით…
გულშემატკივრებთან, გუნდთან და ქალაქთან ერთად, დიეგოსთან მიწევს დამშვიდობება. ნახვამდის დიეგო! ნახვამდის ნაპოლი!”
ხვიჩა კვარაცხელია
კვარა ნაპოლის ღირსებას 2022 წლის ზაფხულიდან იცავდა. ნაპოლის შემადგენლობაში ხვიჩამ 107 ჩატარებულ შეხვედრაში 30 გოლი გაიტანა და 29 საგოლე გადაცემა შეასრულა.
მოიგო სკუდეტო, ნაპოლისთვის ბოლო 33 წელიწადში პირველად. გახდა სერია A-ს საუკეთესო ფეხბურთელი. დაასახელეს ჩემპიონთა ლიგის საუკეთესო ახალგაზრდა ფეხბურთელად და, რაც მთავარია, საქართველო და ქართული ფეხბურთი მსოფლიო და ევროპულ რუკაზე მკაფიოდ გამოაჩინა.
ხვიჩა კვარაცხელია პსჟ-ში
კვარა ნაპოლის გამოემშვიდობა და სამედიცინო შემოწმებას პსჟ-ში პარასკევს გაივლის. შესაბამისად, ქართველი შემტევი, ფრანგული კლუბის ფეხბურთელი ოფიციალურად ხვალ გახდება.
ნაპოლიდან პსჟ-ში გადასვლის შემდეგ ხვიჩა გახდება ისტორიაში ყველაზე ძვირადღირებული ქართული ტრანსფერის მონაწილე.
კვარა პსჟ-ს მომავალს 5 წლის ვადით დაუკავშირებს და მისი წლიური ანაზღაურება ზრდადი იქნება. ის 8 მილიონი ევროდან დაიწყება და 11 მილიონამდე გაიზრდება.
