უიმბლდონი 2025 მოულოდნელობებით აღსავსე აღმოჩნდა. მეორე წრის დასასრულისთვის ტურნირი უკვე დატოვა 36-მა განთესილმა, რეიტინგულმა მოთამაშემ, რაც ისტორიაში უპრეცედენტო შემთხვევაა. აქამდე ტოპ მოთამაშეთა ასეთი რაოდენობა ერთდროულად ტურნირს, ამ ეტაპზევე, არასდროს გამომშვიდობებია.
მათ შორის, ვინც ტურნირს ნაადრევად გამოეთიშა, იყვნენ მსოფლიოს ნომერ მეორე ჩოგანი კოკო გოფი, მესამე ნომრად განთესილი ალექსანდრ ზვერევი და ბრიტანეთის იმედი ჯეკ დრეიპერი.
უიმბლდონი 2025 – პირდაპირი რეპორტაჟი
ჩვენს პლატფორმაზე ფასდაკლების მისაღებად შეგიძლიათ, პრომო კოდები NEWS25 ან YEAR25 გამოიყენოთ.
NEWS25 – ერთთვიან გამოწერაზე – 30%.
YEAR25 – ერთწლიან გამოწერაზე – 30%.
პროცესი ამ ორი ბანერიდან სასურველზე ხელის დაჭერითაც შეგიძლიათ დაიწყოთ.
ამასთან, ძველი პრომო კოდები – NEWS24 და YEAR24 კვლავ აქტიურია.
რა გახდა მასობრივი წარუმატებლობის მიზეზი?
სიცხე და რთული სათამაშო პირობები
ტურნირის პირველივე დღეებში ლონდონში დაფიქსირდა +30°C-ზე მაღალი ტემპერატურა – უიმბლდონის ისტორიაში ერთ-ერთი ყველაზე ცხელი სტარტი.
მოთამაშეები იყენებდნენ ყინულის პაკეტებს, ცივ პირსახოცებს და უხვად სვამდნენ წყალს, თუმცა ბევრი მათგანი მაინც აღიარებდა, რომ მსგავსი პირობები ორგანიზმისთვის სერიოზული გამოწვევა იყო.
გარდა სიცხისა, პრობლემას ქმნიდა ბალახის საფარის მდგომარეობაც.
კანადელმა დენის შაპოვალოვმა, რომელიც პირველივე წრეში დამარცხდა, განაცხადა:
„ეს ბალახი აღარ ჰგავს ნამდვილ ბალახს – კორტი უფრო ნელია, ვიდრე თიხაზე.“
მძიმე და შენელებული ბურთები
რამდენიმე ჩოგბურთელმა ყურადღება გაამახვილა ბურთების ხარისხზეც.
ემა რადუკანუმ აღნიშნა:
„ახალი ბურთით თამაშში განსხვავება იგრძნობა, მაგრამ რამდენიმე გეიმის შემდეგ ისინი უფრო დრეკადები ხდება, მძიმდება და თამაშს ანელებს. ეს უპირატესობას აძლევს ძლიერ დამრტყმელ მოთამაშეებს.“
ორგანიზატორების განცხადებით, ბურთების ტექნიკური მახასიათებლები 1995 წლის შემდეგ არ შეცვლილა, თუმცა მოთამაშეებს შეგრძნება ექმნებათ, რომ თბილ, მშრალ ამინდში ბურთები უფრო მსუბუქია, ხოლო ცივ ამინდში – უფრო მძიმე და ნელი.
ბალახის მოკლე სეზონი
ბალახის სეზონი პროფესიულ ჩოგბურთში ყველაზე მოკლეა, დაახლოებით 6 კვირა. იგი ზოგჯერ მაშინ იწყება, როდესაც როლან გაროსი ჯერ კიდევ არ არის ხოლმე დასრულებული.
კოკო გოფმა აღნიშნა:
„ბოლოს და ბოლოს, სწორედ ამ ტურნირზე ხდება ყველაზე მეტი სიურპრიზი, რადგან მოთამაშეები ვერ ასწრებენ ბალახზე სათანადოდ მომზადებას.“
ტურნირის დირექტორმა ჯეიმი ბეიკერმა თქვა:
„მოთამაშეები ბალახზე ბევრად ნაკლებ დროს ატარებენ, ვიდრე სხვა საფარზე. პრობლემა სისტემურია – კალენდარი გადატვირთულია.“
ფიზიკური და მენტალური გადაღლა
ქალთა და მამაკაცთა ტურში გადატვირთული კალენდარი დიდი ხანია კრიტიკის საგანია.
ნორვეგიელმა კასპერ რუდმა ATP-ის რეიტინგული სისტემა „ვირთხების რბოლას“ შეადარა.
ავსტრალიელმა ალექს დე მინორმა კი როლან გაროსზე მარცხი „მენტალურ გადაღლას“ დააბრალა.
მეორე წრეში დამარცხებულმა ჟასმინ პაოლინიმ აღნიშნა:
„გონებრივადაც გადაღლილი ვარ. ეს ბოლო ორი თვე ძალიან ინტენსიური გამოდგა.“
ალექსანდრ ზვერევმა, რომელიც ფინალში დამარცხდა ავსტრალიის ღია პირველობაზე იანვარში, აღიარა, რომ თავს კვლავ „ფსიქოლოგიურ ორმოში“ გრძნობს და „კორტზე მარტოობას“ განიცდის.
ფსიქოლოგიური ზეწოლა და გაძლიერებული კონკურენცია
მედისონ კიზი:
„როდესაც ხედავ, როგორ მარცხდებიან ტოპ მოთამაშეები, ეს გრძნობას აძლიერებს, რომ შენც შეიძლება ასე დაეცე. პირველ წრეში მეც ძლივს გადავრჩი.“
ამავდროულად, როგორც ქალთა, ისე მამაკაცთა ტურში მკვეთრად გაიზარდა საშუალო დონის მოთამაშეთა კლასი.
ფრენსის ტიაფო:
„დღეს უამრავი ახალგაზრდა და დაუნდობელი მოთამაშეა. თუ სრულად მზად არ ხარ, დამარცხდები.“
ვინ სარგებლობს შექმნილი სიტუაციით?
ქალთა ბადეში მოლოდინები გაიზარდა ამანდა ანისიმოვასთვის, რომელსაც ნახევარფინალამდე სავარაუდოდ არც ერთი მაღალი რეიტინგის მოთამაშე არ შეხვდება.
კაცთა ბადეში კი კარენ ხაჩანოვი და ქემერონ ნორი შეძლებენ მეოთხედფინალში გასვლას ისეთი ბარიერების გარეშე, რომლებიც ჩვეულებრივ ძალზე რთული იქნებოდა.
ტურნირს შემორჩენილი ტოპ 10 განთესილი ჩოგბურთელი
ქალები:
- არინა საბალენკა [1]
- მედისონ კიზი [6]
- მირა ანდრეევა [7]
- იგა შვიონტეკი [8]
- ემა ნავარო [10]
კაცები:
- იანიკ სინერი [1]
- კარლოს ალკარასი [2]
- ტეილორ ფრიცი [5]
- ნოვაკ ჯოკოვიჩი [6]
- ბენ შელტონი [10]
უნდა დაბრუნდეს ბალახზე სპეციალური განთესვის სისტემა?
2002-დან 2019 წლამდე მამაკაცთა განთესვის სისტემა ითვალისწინებდა მოთამაშის შედეგებს ბალახზე.
შემდგომ წლებში ეს მიდგომა გაუქმდა და განთესვა საერთო რეიტინგის სისტემაზე გადავიდა.
ყოფილმა ბრიტანელმა ჩოგბურთელმა ჯო დიურიმ აღნიშნა:
„ბალახი სრულიად განსხვავებული საფარია და შესაძლოა, სწორედ ასეთი სპეციალიზირებული მიდგომა იყოს გამოსავალი.“
ასეა თუ ისე, უიმბლდონი 2025 აშკარად უხვადაა გაჯერებული სიურპრიზებით.
უყურეთ უიმბლდონს პირდაპირ ეთერში – setantasports.com
