RKENA 1 – სულ რამდენიმე ხნის წინ დასრულდა MMA-ის ისტორიული ღონისძიება თბილისის სპორტის სასახლეში, სადაც მთავარ ივენთზე საქართველოს რაგბის ყოფილი კაპიტანი, მერაბ შარიქაძე პოლონელ პატრიკ კონტნის დაუპირისპირდა.
შარიქაძემ MMA-ში თავისი სადებიუტო ბრძოლა გამართა და სპორტის ცვლილება ისტორიული გამარჯვებით მოიპოვა – ქართველმა პოლონელი მეტოქე მეორე რაუნდში ტექნიკური ნოკაუტით დაამარცხა.
რაგბის ნაკრების ყოფილი კაპიტნის ემოციური სიტყვები MMA-ში მოპოვებული პირველი გამარჯვების შემდეგ:
“დამღლელი ყოფილა, ყოჩაღ ბიჭებს, ვინც ამ სპორტს ასე პროფესიონალურად მისდევს და ასეთ რთულ მომენტებს ამდენჯერ გადიან – ყოჩაღ.
სალაპარაკო ბევრი დამიგროვდა, თუმცა ვეცდები მოკლედ ვთქვა. პირველ რიგში, მადლობა ყველას, ვინც ღონისძიებაზე მობრძანდა. თქვენი მხარდაჭერა არის ფასდაუდებელი რამ, თქვენ რომ არა, მე დღეს აქ ვერ მიხილავდით.
მინდა მადლობა გადავუხადო რაგბის ყველა გულშემატკივარს და MMA-ის გულშემატკივარს.
და ბოლოს, მადლობა ჯახს, მეუღლეს – ჩემს ყველაზე დიდ გულშემატკივარს, რომელიც სამწუხაროდ დღევანდელ დღეს ვერ მოესწრო, დედაჩემს გაუმარჯოს. ეს გამარჯვება მას ეკუთვნოდა და მას მივუძღვენი. დე შენ სულს ვენაცვალე და შენი სახელის ხსოვნა იყოს”
RKENA 1-ის ივენთზე არა ერთი სანახაობრივი ბრძოლა ვიხილეთ – პრელიმების ჩათვლით მხოლოდ ორი ბრძოლა მივიდა მსაჯთა გადაწყვეტილებამდე, დანარჩენ 7 შემთხვევაში მაყურებელმა ნოკაუტი იხილა.
RKENA 1 სხვა ბრძოლები
რკენას ისტორიული ღონისძიების პირველი ბრძოლა 17 წლის ქართველ ნინი ცქვიტარიასა და გამოცდილ ესპანელ ელზა სერესოს შორის შედგა. მსაჯთა გაყოფილი გადაწყვეტილებით, გამარჯვებული ესპანელი დარჩა, თუმცა ბრძოლა ძალიან ახლო იყო.
პრელიმის მეორე ბრძოლაში ზუკა ივანიაძემ ქარდის ერთერთი ყველაზე ეფექტური ნოკაუტი შემოგვთავაზა. ქართველმა სპინინგ ბექ ქიქით ბრაზილიელი რამონ დრუმის ღვიძლი დააზიანა და ეფექტური ნოკაუტი აიღო.
ტექნიკური ნოკაუტით გაიმარჯვა საბა სოზაშვილმაც, რომელმაც პოლონელი ზაიაცის ქიქი იდეალურად დაჩეკა და მეტოქეს მუხლის ტრავმა მიაყენა, რომლის შემდეგაც პოლონელმა ბრძოლა ვეღარ გააგრძელა.
აბსოლუტური დომინაცია შემოგვთავაზა ჯანსუ გოგიამ უზბეკი მეტოქის – იულდაშევის წინააღმდეგ. ქართველმა სამივე რაუნდი მოიგო და გრეპლინგის აბსოლუტური მასტერკლასი გვაჩვენა.
მეორე ქართველი, რომელმაც RKENA 1-ის ღონისძიებაზე წააგო ჯუბა ბერიძეა, ქართველი უკრაინელ იაროსლავ ჩოკობოკთან პირველ 12 წამში დამარცხდა. მიუხედავად იმისა, რომ ბერიძემ მეტოქეს სასტარტო წამებში ტანში უძლიერესი დარტყმა მიაყენა, შემდეგ არასწორ დროს ჩავიდა ფეხში, რა დროსაც მეტოქის მუხლი დახვდა და ბრუტალურად გაითიშა – უდავოდ ქარდის ერთ-ერთი გამორჩეული ნოკაუტი.
RKENA 1-ის ერთ-ერთი ყველაზე გამორჩეული ბრძოლა გაიმართა ორ დაუმარცხებელ მებრძოლს – გიორგი ფოლადიშვილს და ერასილ ტანირბეგოვს შორის, სადაც ქართველმა მებრძოლა ჯერ საოცარი დაცვა შემოგვთავაზა, ხოლო შემდეგ მეტოქე მიწაზე გადაიყვანა და ტექნიკური ნოკაუტით გაიმარჯვა.
კიდევ ერთი ქართველი, რომელმაც აბსოლუტური დომინაციით მოიგო ნიკოლოზ აბრაიმიშვილია. ქართველმა მებრძოლმა ქარზე ყველაზე სახელოვანი მებრძოლი – ჰენრი ლინტულა გაანადგურა და მეტოქე მეორე რაუნდში ნოკაუტით დაამარცხა.
ივენთის ერთ-ერთი ყველაზე ეფექტური ფინიში მოიპოვა კიდევ ერთმა ქართველმა – დავით ლორთქიფანიძემ, რომელმაც ბრაზილიელი ლეანდრო ბარბოსა მუხლით ბრუტალურად გათიშა.
