რა გუნდია ვილიარეალი – გიორგი მიქაუტაძის ტრანსფერი

ვილიარეალი – ახალი კლუბი, რომელიც ფეხბურთის ქართველი გულშემატკივრებისგან განსაკთრებული ინტერესის საგანი გახდა. ცხადია, ვილიარეალს ფეხბურთის განსწავლულ ქომაგებში დიდი წარდგენა არ სჭირდება, თუმცა საინტერესოა, მაინც სად გადადის ჟორჟი.

ვილიარეალი – ვალენსიის პროვინციის თვალწარმტაცი ქალაქი, სადაც ტრადიციები, მზის სხივებით განათებული ქუჩები და ფეხბურთის სიყვარული ერთ მთლიან ისტორიად იქცევა.

ქალაქი ცნობილი არა მხოლოდ კულტურითა და ტრადიციებით, არამედ ფეხბურთის სიყვარულითაც – სწორედ აქ ბინადრობს ყვითელი წყალქვეშა ნავის ვილიარეალი, სადაც შეგიძლიათ, ერთდროულად აღმოაჩინოთ ესპანური ცხოვრების სითბო, სპორტული ემოციები და ზღვისპირეთი მთელი მისი დიდებულებით.

ლა ლიგა 2025-26 წლების სეზონის ხილვას მაყურებელი ინგლისურენოვანი კომენტირებით, setantasports.com-ზე შეძლებს.

ჩვენს პლატფორმაზე ფასდაკლების მისაღებად შეგიძლიათ, პრომო კოდები NEWS25 ან YEAR25 გამოიყენოთ.

NEWS25 – ერთთვიან გამოწერაზე – 30%.

YEAR25 – ერთწლიან გამოწერაზე – 30%.

პროცესი ამ ორი ბანერიდან სასურველზე ხელის დაჭერითაც შეგიძლიათ დაიწყოთ.

ამასთან, ძველი პრომო კოდები – NEWS24 და YEAR24 კვლავ აქტიურია.

• გიორგი მიქაუტაძის ტრანსფერი – ლიონიდან ვილიარეალში

ვილიარეალი – პატარა ქალაქის დიდი ამბიცია

ფეხბურთის სამყაროში არსებობენ კლუბები, რომლებიც ქალაქის ზომით, ფინანსური რესურსებითა და სტადიონის ტევადობით თითქოს ვერასდროს უნდა ახერხებდნენ ელიტაში დამკვიდრებას, თუმცა ლოგიკის საპირწონედ, სწორედ ასეთები სძენენ ამ სამყაროს დამატებით ელფერსა და ხიბლს.

სწორედ ასეთია ვილიარეალიც – პატარა ქალაქის გუნდი, რომელმაც შეძლო, ევროპული ფეხბურთის ერთ-ერთ გამორჩეულ ისტორიად ქცეულიყო.

დასაწყისი და აღმასვლა

ვილიარეალი1923 წელს დაარსდა, თუმცა რამდენიმე ათწლეული ესპანური ფეხბურთის საშუალო შრეებში გაატარა. დიდ სცენაზე მისი აღმასვლა დაიწყო 1990-იან წლებში, როდესაც კლუბმა სეგუნდადან ლა ლიგაში გადასვლა შეძლო.

მთავარი გარდატეხა მოხდა 2000-იან წლებში, როდესაც გუნდმა სტაბილურად დაიწყო ევროტურნირებზე ასპარეზობა.

ყველაზე დიდი, ხმაურიანი წარმატება 2005-06 სეზონს უკავშირდება: ვილიარეალი ჩემპიონთა ლიგის ნახევარფინალამდე მივიდა და მხოლოდ ერთი გოლით ჩამორჩა ფინალში გასულ არსენალს.

ეს იყო ნიშანი, რომ პატარა ქალაქის გუნდიც კი შეიძლება იქცეს ევროპულ სიურპრიზად და მთავარ მოულოდნელობად.

ისტორიის კულმინაცია – ევროპა ლიგის ტრიუმფი

2020-21 სეზონში ვილიარეალმა საკუთარ ისტორიაში ყველაზე დიდი ტიტული მოიპოვა. ევროპა ლიგის ფინალში გუნდმა პენალტების უდრამატულეს სერიაში დაამარცხა მანჩესტერ იუნაიტედი და თასი თავს ზემოთ ასწია. ეს წარმატება არა მხოლოდ კლუბის, არამედ მთელი ქალაქის ისტორიაში უდიდეს მოვლენად იქცა.

თასმა საბოლოოდ დაამკვიდრა კლუბის სახელი ევროპულ რუკაზე და დაამტკიცა, რომ სტაბილური პროექტი, გონუვრული ტრანსფერები და სწორი მენეჯმენტი, თავისუფლად შეიძლება ტიტულებსა და დიდ წარმატებაში გადაიზარდოს.

მარსელინო – მწვრთნელი, რომელმაც ვილიარეალს სული დაუბრუნა

მარსელინო გარსია ტორალი ვილიარეალის ისტორიაში ერთ-ერთი ყველაზე წარმატებული და სიმბოლური ფიგურაა. მისი დაბრუნება 2023 წელს აღიქმებოდა როგორც სერიოზული ნაბიჯი სტაბილურობისკენ.

მისი ფილოსოფია მკაფიოდაა ჩამოყალიბებული:

• ორგანიზებული დაცვა და სწრაფი კონტრშეტევები – მარსელინო დიდ მნიშვნელობას ანიჭებს ბალანსს, სადაც დაცვა არის საფუძველი, ხოლო სხარტი შეტევები – შედეგიანობის მთავარი იარაღი.
• დისციპლინა და ინტენსიურობა – მისი ხელმძღვანელობით გუნდს სჭირდება მაქსიმალური ფიზიკური მზადყოფნა და ტაქტიკური დისციპლინა.
• 4-4-2 სქემა – მარსელინო ხშირად იყენებს კლასიკურ, მაგრამ მოქნილ 4-4-2 ფორმაციას, რომელიც საშუალებას აძლევს გუნდს იყოს თანაბრად ძლიერი როგორც დაცვაში, ისე შეტევაში.

ესტადიო დე ლა სერამიკა – სტადიონი და იდენტობა

ესტადიო დე ლა სერამიკა, რომელსაც ადრე ელ მადრიგალი ერქვა, ერთ-ერთი ყველაზე უნიკალური არენაა ესპანეთში. მისი ტევადობა დაახლოებით 23 000-ს შეადგენს, თუმცა ატმოსფერო, როგორც წესი, განსაკუთრებით ინტენსიურია ხოლმე.

გულშემატკივრები – ყვითელი წყალქვეშა ნავის სიმღერის ფონზე – ქმნიან გარემოს, რომელიც მეტოქეებისთვის რთულ გამოცდად იქცევა.

რატომ ჰქვია ვილიარეალს ყვითელი წყალქვეშა ნავი

ვილიარეალს „ყვითელი წყალქვეშა ნავი“ (El Submarino Amarillo) რამდენიმე მიზეზის გამო შეერქვა:

მუსიკალური ინსპირაცია

1960-იანი წლების ბოლოს The Beatles-ის სიმღერა Yellow Submarine ძალიან პოპულარული გახდა ესპანეთში. კლუბის გულშემატკივრებმა სწორედ ამ მელოდიას მიამაგრეს საკუთარი გუნდი – ყვითელი ფერის ფორმისა და სიმღერის შერწყმით. სტადიონზე ხშირად მღეროდნენ „Somos el Submarino Amarillo“ („ჩვენ ვართ ყვითელი წყალქვეშა ნავი“).

ფორმის ფერი

ვილიარეალის მთავარი სიმბოლო მისი ყვითელი მაისურებია. ეს ფერი განსხვავებული და იოლად ამოსაცნობია სხვა ესპანურ გუნდებს შორის, რის გამოც მეტსახელი კიდევ უფრო დამკვიდრდა.

საფეხბურთო სიმბოლიკა

„წყალქვეშა ნავის“ მეტაფორა იმასაც აღნიშნავს, რომ მიუხედავად კლუბის შედარებით მცირე ისტორიული მასშტაბებისა, ვილიარეალი ყოველთვის „ჩუმად, ქვემოდან“ ამოდის და ახერხებს ძლიერ გუნდებთან ბრძოლას, ზოგჯერ კი მათ დამარცხებასაც – თითქოს წყალქვეშიდან მოულოდნელად ამოსულმა გემმა დიდი ტალღა დაარტყაო.

საბოლოოდ, გულშემატკივართა სიმღერამ, ფორმის ფერმა და კლუბის საფეხბურთო ხასიათმა ეს მეტსახელი იდენტობის უცვლელ ნაწილად აქცია.

ვილიარეალი – ტიტულები და მიღწევები

• ევროპა ლიგა – გამარჯვებული (2020/21)
• უეფას სუპერთასი – ფინალისტი (2021, წააგო ჩელსისთან პენალტებში)
• ლა ლიგა – საუკეთესო შედეგი: მე-2 ადგილი (2007/08)
• კოპა დელ რეი – არაერთხელ ნახევარფინალში გასვლა
• სეგუნდა დივიზიონი – ჩემპიონი (1997/98, 2012/13)
• ჩემპიონთა ლიგა – ნახევარფინალი (2005/06), მეოთხედფინალი (2008/09, 2021/22)

ვილიარეალი არის მაგალითი იმისა, რომ ფეხბურთში ფინანსური ძალა ყოველთვის არ არის გადამწყვეტი. პატარა ქალაქის გუნდმა შეძლო ევროპული ტურნირის მოგება, რეგულარულად უპირისპირდება ესპანურ გრანდებს და რაც მთავარია, აქვს საკუთარი იდენტობა და ხელწერა.

მარსელინოს დაბრუნების შემდეგ კლუბი ცდილობს მიაღწიოს კიდევ უფრო მეტ სტაბილურობასა და მიზნად ისახავს ლა ლიგასა და ევროტურნირებზე მუდმივად მაღალი მიზნებისთვის ბრძოლას კონკურენტუნარიანობის ფონზე. ვილიარეალი განასახიერებს ფეხბურთის რომანტიკას – ამბავს, სადაც პატარა ქალაქის ერთგულება და სწორად აწყობილი პროექტი დიდ ისტორიას ბადებს.

ვილიარეალი – სიახლეები

ლა ლიგის მომდევნო ტურში ვილიარეალი, რომელიც ლა ლიგას 2 ტურის შემდეგ ლიდერობს, ვიგოს სელტას ესტუმრება.

მატჩისწინა პრესკონფერენციით, ალბათ კარგად გამოჩნდება, თუ რა არის კლუბში აქტუალური თემები.

მარსელინოს სიტყვები ემოციური და მწვავე იყო – მოთამაშეთა წასვლაზე, ახალ ფეხბურთელებსა და სატრანსფერო ბაზრის თავისებურებებზე.

ემოციური დამშვიდობება იერემი პინოსა და დენის სუარესს

მარსელინომ განსაკუთრებული სითბოთი ისაუბრა იერემი პინოსა და დენის სუარესის კლუბიდან წასვლაზე:

„იერემის წასვლა მოულოდნელი იყო. ის 2016 წლიდან იყო კლუბში, ყველა საფეხური გაიარა, პირველ გუნდში დამკვიდრდა და ვილიარეალის დიდ მიღწევებში თავისი წვლილი შეიტანა. მადლობას ვუხდი მისი შრომის, გულწრფელობისა და ამბიციისთვის.

დენის სუარესი კი ჩემთვის ყოველთვის პროფესიონალი და ღირსეული ადამიანი იყო – როგორც თამაშის, ასევე უქმობის დროს. განსაკუთრებულ მადლობას ვუხდი მისი დამოკიდებულებისთვის და ორივეს წარმატებას ვუსურვებ ახალ გზაზე“.

აიოზე პერესის დაბრუნება

სასიხარულო სიახლე იყო აიოზე პერესის დაბრუნება:
„ხოლო ხვალინდელ ვარჯიშზე დავინახავთ მისი მზადყოფნის დონეს. მომავალ მატჩში, სასტარტო შემადგენლობაში ვერ იქნება, თუმცა შესაძლოა განაცხადში მოხვდეს და გარკვეული წუთები მიიღოს. ეს მნიშვნელოვანი დაბრუნებაა ჩვენი შეტევისთვის“.

ახალი სახე – ტანი ოლუვასეი

ვილიარეალის რიგებს ტანი ოლუვასეი შეემატა, რომელსაც მარსელინო ოპტიმისტურად უყურებს:

„თიერნო ბარის წასვლის შემდეგ გვჭირდებოდა ახალი რესურსი. ოლუვასეი განსხვავებული ტიპის მოთამაშეა, მაგრამ მას შეუძლია სიღრმის, სიჩქარისა და შედეგიანობის დამატება. ბუნებრივია, ახალ ლიგაში ადაპტაცია დროის საკითხია, მაგრამ მისი ფიზიკური მონაცემები და შესაძლებლობები იმედს გვაძლევს“.

მეკარეების კონკურენცია – ჯანმრთელი სურათი

მარსელინოს თქმით, გუნდში სამი მეკარის აქტიური კონკურენცია პრობლემა არ არის:

„ყველას ექნება საკუთარი შანსი. ვინც უკეთესად ითამაშებს, მეტ დროს მიიღებს. ჩვენი მიზანია ნაკლები ბურთი გავუშვათ, რაც მაღალი მიზნების მისაღწევად გადამწყვეტია“.

სატრანსფერო ბაზრის კრიტიკა

პრესკონფერენციის ბოლოს მწვრთნელმა სატრანსფერო ფანჯრის დახურვის დრო გააკრიტიკა:

„ბაზრის დახურვა უკვე დაწყებული სეზონის დროს ძალიან არაკომფორტულია. მწვრთნელებს გვიწევს ადაპტაცია, თუმცა რეალობა ასეთია. ჯობდა, ფანჯარა ადრე დასრულებულიყო, მაგრამ ეს გადაწყვეტილებები ჩვენზე არაა დამოკიდებული. ჩვენ მხოლოდ შეგვიძლია ამას მოვერგოთ“.

მარსელინოს განცხადებები ნათლად აჩვენებს, რომ ვილიარეალი ცვლილებების პროცესშია – გუნდი ემშვიდობება თავის აღზრდილებსა და გამოცდილ ფეხბურთელებს, პარალელურად კი ახალ სახეებს აძლევს შანსს. სელტასთან მოახლოებული დაპირისპირება კი პირველი დიდი გამოცდა იქნება განახლებული შემადგენლობისთვის.

ცხადია, ამ მატჩში ვერ ითამაშებს გიორგი მიქაუტაძე. საქართველოს ნაკრების ფორვარდი სათამაშო დროს უკვე სანაკრებო შესვენების შემდეგ, სექტემბრის შუა ნაწილიდან მიიღებს.